Կառավարությունը փոխում է ֆուտբոլիստներին զորակոչից տարկետման տրամադրման կարգը

Ֆուտբոլիստներին պարտադիր զինվորական ծառայության զորակոչից տարկետում հատկացնելու ընթացակարգերի բարելավման, արդյունավետության բարձրացման ու հստակեցման նպատակով գործադիր մարմինը որոշում է կայացրել:

Գործող կարգավորումների համաձայն՝ ֆուտբոլի յուրաքանչյուր հավաքականից պարտադիր զինվորական ծառայության զորակոչի ենթակա առավելագույնը 30 մարզիկ կարող է ստանալ տարկետման իրավունք: Այդուհանդերձ, հաշվի առնելով ֆուտբոլիստների մարզական առաջընթացի առանձնահատկությունները, ներկա դրույթները չեն ապահովում երիտասարդ ֆուտբոլիստների բնականոն զարգացումը, քանի որ երիտասարդական ընտրանու կազմում ավելի մեծ թվով խաղացողներ ներգրավելու պահանջ է առաջանում, որոնց մարզումների շարունակականության ապահովման շնորհիվ միայն հնարավոր է նրանցից ոմանց ընդգրկել ազգային հավաքականում: Մասնավորապես, վերջին տարիներին պատանեկան ու երիտասարդական թիմերում տարկետումից օգտվող մարզիկների քանակը եղել է 30-ական, իսկ ազգային հավաքականի պարագայում 2025 և 2026 թվականներին այն կազմել է 8-10 մարզիկ: 

Դրանից ելնելով՝ ներկայումս գործող կարգով հավաքականները պատանեկան, երիտասարդական ու մեծահասակների տարանջատելը և ըստ այդմ համապատասխան թվով խաղացողների տարկետում տալը չի սպասարկում սահմանված նպատակին, քանի որ հաշվի չեն առնվել ֆուտբոլի առանձնահատկությունները: Հայաստանի ֆուտբոլի և ֆուտզալի պատանեկան ու երիտասարդական ազգային հավաքականների խաղացողներին տարկետումը տրամադրվում է մինչև երկու տարի ժամկետով, սակայն երիտասարդական թիմի անդամ համարվում են մինչև 21 տարեկանը լրանալը, ուստի տարկետման ժամանակահատվածը պետք է փոխկապակցվի հավաքականի անդամության կարգավիճակի հետ: 

Նախատեսվող փոփոխությունները միտված են կատարելագործելու ֆուտբոլիստների պարտադիր զինվորական ծառայության զորակոչից տարկետում ստանալու ընթացակարգը, այն դարձնելու ավելի արդյունավետ ու հստակ՝ հաշվի առնելով ֆուտբոլի առանձնահատկությունները, ինչը կնպաստի մարզաձևի զարգացմանն ու մասսայականացմանը։ Դրա արդյունքում հնարավորություն կստեղծվի ավելի մեծ թվով լավագույն մարզիկների ներգրավել ազգային հավաքականների կազմերում: