Քոչարյանը երկար ժամանակ երազելու է , որպեսզի փախնի Հայաստանից ու չի կարողանալու. Ալեքսանյան

Վահագն Ալեքսանյանը մեկնաբանել է օդանավակայանում Ռոբերտ Քոչարյանի մասնակցությամբ արված տեսանյութերի հրապարակումը։ 

Լրագրողի հարցին, թե  անձնական տվյալներ պարունակող այդ կադրերն ինչպես և ինչ թույլտվությամբ են հայտնվել իշխանական կայքերից մեկում, Վահագն Ալեքսանյանը պատասխանել է, որ լրատվամիջոցների կայքերում պարբերաբար տարբեր նյութեր են հայտնվում, և հայտնի չէ, թե որտեղից։ Նա հավելել է, որ ընդդիմադիր կայքերը թերթելիս կարող է տպավորություն ստեղծվել, թե իշխանական խմբակցության նիստերից արտահոսք կա, մինչդեռ դրանց 90 տոկոսը սուտ է։

Անդրադառնալով անձնական կյանքի վերաբերյալ դիտարկմանը՝ պատգամավորը նշել է, որ օդանավակայանը հանրային տարածք է, և դա նույնը չէ, ինչ մարդու անկողինը նկարելը։

Ալեքսանյանը հայտարարել է, որ Ռոբերտ Քոչարյանը երկար ժամանակ երազելու է փախչել Հայաստանի Հանրապետությունից և չի կարողանալու փախչել։ Նա նաև հավելել է, որ եթե Ռոբերտ Քոչարյանն ուզում է ինչ-որ տեղ մտնել, թող գա խորհրդարանի դահլիճ՝ խոստանալով, որ նրա համար անմոռանալի նիստեր կլինեն։