Նարեկ Մանթաշյանը հայտնում է «Նուբարաշեն» ՔԿՀ-ում իրականացված խուզարկությունների մասին

«Հայաստան» դաշինքի անդամ Նարեկ Մանթաշյանը հայտնել է, որ «Նուբարաշեն» քրեակատարողական հիմնարկից ահազանգ է ստացել այսօր առավոտյան ժամը 07:00-ից մեկնարկած խուզարկությունների վերաբերյալ։

Ըստ նրան փոխանցված տեղեկությունների՝ իրականացված գործողությունները, այնտեղ գտնվող անձանց պնդմամբ, ուղեկցվել են նվաստացնող և անմարդկային վերաբերմունքի տարրերով։ Մասնավորապես նշվում է, որ 7-րդ մասնաշենքի 12-րդ խցում անձնական իրերը թափվել են հատակին, ինչն առաջացրել է լարված իրավիճակ։

Նարեկ Մանթաշյանը նշել է. «Ինձ նաև տեղեկացրել են, որ տեղի ունեցածի հետևանքով հուզական ծանր վիճակում գտնվող անձանց շրջանում խոսակցություններ են եղել ինքնավնասման վերաբերյալ։ Հեռախոսազրույցի ընթացքում կոչ եմ արել զերծ մնալ նման քայլերից և որևէ պարագայում չվտանգել սեփական առողջությունն ու կյանքը։ Հաշվի առնելով ստացված ահազանգերի լրջությունը՝ կոչ եմ անում իրավասու մարմիններին անհապաղ պարզաբանել իրավիճակը և հրապարակային պատասխան տալ բարձրացված հարցերին։ Միաժամանակ, պատգամավոր գործընկերներիս խնդրում եմ հնարավորինս արագ արձագանքել, այցելել քրեակատարողական հիմնարկ և տեղում ուսումնասիրել ներկայացված տեղեկությունները։ Մարդու արժանապատվությունը, իրավունքներն ու անվտանգությունը չեն կարող սահմանափակվել անգամ ազատազրկման պայմաններում։ Յուրաքանչյուր ահազանգ պետք է ստանա պատշաճ և անհապաղ արձագանք»։