ԱՄՆ-Իրան համաձայնագիրը կստորագրվի առցանց. ինչ է հայտնի

Axios-ը պարզել է, թե ինչու ԱՄՆ-ի և Իրանի միջև համաձայնագրի ստորագրումը կանցկացվի վիրտուալ ձևաչափով:

Axios-ի տեղեկություններով՝ ԱՄՆ-ը և Իրանը, ինչպես նաև պակիստանցի և կատարցի միջնորդները, կիրակի օրը կանցկացնեն առցանց հանդիպում և էլեկտրոնային եղանակով կստորագրեն փոխըմբռնման հուշագիր, որը կերկարաձգի հրադադարի ռեժիմը 60 օրով, կբացի Հորմուզի նեղուցը և կմեկնարկի Իրանի միջուկային ծրագրի շուրջ բանակցությունները։

Ամերիկացի պաշտոնյաները հաստատել են, որ ստորագրումը տեղի կունենա վիրտուալ ձևաչափով՝ հիմնականում լոգիստիկ պատճառներով։ Դրանցից մեկն այն է, որ ԱՄՆ փոխնախագահ Ջեյ Դի Վենսը չէր հասցնի վերադառնալ ԱՄՆ մինչև Թրամփի մեկնումը Ֆրանսիա՝ G7-ի գագաթնաժողովին մասնակցելու համար:

Թրամփը հանդիպում կունենա Եգիպտոսի, Կատարի և ԱՄԷ-ի առաջնորդների հետ։ Իսրայելի վարչապետ Բենիամին Նեթանյահուի մասնակցությունն այդ հանդիպմանը չի սպասվում։

Միաժամանակ Իսրայելում մտավախություն ունեն, որ գործարքը ոչ թե կդադարեցնի Իրանի միջուկային ծրագիրը, այլ պարզապես կհետաձգի այն, իսկ Թեհրանը կստանա տասնյակ միլիարդավոր դոլարներ՝ սառեցված ակտիվների ապասառեցման արդյունքում։