ՏԵՍԱՆՅՈՒԹ․ Հուլիսի 1-ից կգործի ընտանիքի անապահովության գնահատման նոր համակարգ․ Արսեն Թորոսյան

Հայաստանի Հանրապետության բոլոր մարզերում և մայրաքաղաք Երևանում հուլիսի 1-ից կգործի ընտանիքի անապահովության գնահատման նոր համակարգ։ Այս  մասին  Կառավարության նիստի ժամանակ ներկայացրել է Աշխատանքի և սոցիալական հարցերի նախարար Արսեն Թորոսյանը։

«Հայաստանում երկար տարիներ գործել է այսպես կոչված «փարոս» համակարգը։ Անցած տարվա ապրիլից մենք նոր համակարգ ենք ներդրել Կոտայքի և Սյունիքի մարզերում, որը փորձնական էր, և այս որոշմամբ տալիս ենք այս փորձնական համակարգի իրականացման ժամանակ ի հայտ եկած խնդիրների լուծումները։ Ընդհանուր առմամբ, այս համակարգը Հայաստանում գործելու է հուլիսի 1-ից»,- մանրամասնել է Թորոսյանը։

Նրա խոսքով՝ հուլիսի 1-ից արդեն բոլոր մարզերում և մայրաքաղաք Երևանում ընտանիքների դիմումները ստանալիս՝ դրանք գնահատվելու են արդեն նոր համակարգով։

«Նոր համակարգն ավելի շատ միտված է ոչ թե մարդկանց այս համակարգում պահելուն, այլ դուրս բերելուն՝ աշխատանքի, կրթության և այլ գործիքների միջոցով։ Մենք կարծում ենք, որ այն բերելու է մեր հազարավոր քաղաքացիների կենսամակարդակի բարձրացմանը»,- ասել է Արսեն Թորոսյանը։