12:00 Լուրերը մեկ տողով. Գազի սակագների ճակատագիրը. ծիրանի ու գինու արտահանման փոխհատուցումները

Անցած ժամվա լուրերը՝ հակիրճ և բովանդակային.

•Հայաստանի ՏԿԵ նախարար Դավիթ Խուդաթյանը հայտարարեց, որ «Գազպրոմի» հետ գազի գնի հնարավոր թանկացման հարցով նոր զարգացումներ կամ փոփոխություններ չկան։

•Էկոնոմիկայի նախարար Գևորգ Պապոյանը հայտնեց, որ Կառավարությունը սուբսիդավորում է ջերմոցային ապրանքների մաքսատուրքերն ու տրանսպորտային ծախսերը, ինչի շնորհիվ արտահանումներ են սկսվել դեպի մի շարք երկրներ։

•Էկոնոմիկայի նախարարը խոստովանեց, որ ԵՄ շուկայից Հայաստանի աշխարհագրական հեռավորության պատճառով որոշակի տեխնիկական խնդիրներ են առաջանում։

•Կառավարության նիստում Նիկոլ Փաշինյանը հայտարարեց, որ իրենց հիմնական անելիքը նոր որակի պետություն ստեղծելու և քաղաքացու անվտանգությունն ու բարեկեցությունն ապահովելու առաքելության շարունակությունն է։

•Էկոնոմիկայի նախարարի տեղակալ Արման Խոջոյանը ներկայացրեց հունիսին արտահանվող մրգերի, հանքային ջրի, գինու և բրենդիի տրանսպորտային ծախսերի սուբսիդավորման ու փոխհատուցման չափերի նախագիծը։

•Վարչապետ Նիկոլ Փաշինյանը, հաշվի առնելով փոխհատուցման չափերը, հորդորեց վերահսկել արտահանման աջակցության որոշման համատեքստում հնարավոր չարդարացված գնաճը։

•ԱՄՆ Կոնգրեսում ներկայացվել է երկկուսակցական բանաձև, որով Ադրբեջանին կոչ է արվում անհապաղ ազատ արձակել Բաքվում պահվող հայ ռազմագերիներին և քաղաքացիական անձանց։

•Կենտրոնական ընտրական հանձնաժողովը տեղեկացնում է, որ ընտրատարածքային ընտրական հանձնաժողովների նստավայրերում շարունակվող վերահաշվարկի աշխատանքները կդադարեցվեն հունիսի 12-ին՝ ժամը 14։00-ին։