Գագիկ Ծառուկյանի փեսուն զրկել են տնից և տնային կալանք տվել. «Հրապարակ»

Երեկ գրել էինք, որ Դատախազությունը Կոտայքի նախկին մարզպետ Կարապետ Գուլոյանի նկատմամբ քրեական հետապնդում է հարուցել՝ արգելանքի տակ գտնվող գույքի հետ ապօրինի գործողություններ կատարելու համար։

Մայիսի 12-ին պետության սեփականություն էր գրանցվել Առինջում գտնվող, Գուլոյանից և նրա կնոջից՝ Ռոզա Ծառուկյանից, բռնագանձված անշարժ գույքի շուրջ 91%-ը։ Քննությամբ պարզվել է, որ Գուլոյանը, իմանալով գույքի վրա դրված արգելանքի մասին, կազմակերպել է տան պատերի, սալիկների, դռների ապամոնտաժում։ Մի խոսքով, Գուլոյանը փորձել է բարեկարգել առանձնատունն ու ընկել իրավապահների ձեռքը։

«Հրապարակ»-ի տեղեկություններով`անցած գիշեր նախաքննական մարմինը նախկին պաշտոնյային կալանավորելու միջնորդություն է ներկայացրել դատարան, որը այսօր լուսադեմին՝ ժամը 5։00-ին մերժվել է։ Ըստ լուրերի համաձայն` դատարանը Գուլոյանի նկատմամբ խափանման միջոց է ընտրել տնային կալանքը` համակցված գրավով։

«Ստացվում է, որ Կարապետ Գուլոյանին և զրկեցին տնից, և տնային կալանք տվեցին»,- գրել է թերթը: