Զատուլինի սպառնացող հայտարարաությունը` Հայաստանում ընտրություններից հետո

Ընտրությունները Հայաստանում կարող են արագացնել Երևանի շրջադարձը և Գյումրիի շուրջ վեճը: Այս մասին հայտնել է Պետդումայի պատգամավոր Կոնստանտին Զատուլինը:

Հայաստանի խորհրդարանական ընտրություններում իշխող «Քաղաքացիական պայմանագիր» կուսակցության հաղթանակը նշանակում է Ռուսաստանից հեռանալու կուրսի շարունակություն, ինչը հեռանկարում հարցականի տակ է դնում Գյումրիում ռուսական ռազմաբազայի գոյությունը։ Այս մասին «ՌՏՎԻ»-ի հետ զրույցում հայտարարել է ԱՊՀ գործերով Պետդումայի կոմիտեի ղեկավարի առաջին տեղակալ Կոնստանտին Զատուլինը։

Ըստ Հայաստանի Կենտրոնական ընտրական հանձնաժողովի՝ բոլոր տեղամասերի նախնական տվյալների, Նիկոլ Փաշինյանի «Քաղաքացիական պայմանագիրը» հունիսի 7-ին կայացած ընտրություններում հավաքել է ձայների 49,81 տոկոսը։ Դա կուսակցությանը իրավունք է տալիս միանձնյա ձևավորել կառավարություն՝ հաշվի առնելով ազգային փոքրամասնությունների մանդատները։

Սամվել Կարապետյանի «Ուժեղ Հայաստան» դաշինքը ստացել է 23,29 տոկոս, հանրապետության նախկին նախագահ Ռոբերտ Քոչարյանի «Հայաստան» դաշինքը՝ 9,94 տոկոս, Գագիկ Ծառուկյանի «Բարգավաճ Հայաստան» կուսակցությունը խորհրդարան է անցել 4 տոկոսով։ Մասնակցությունը կազմել է մոտ 59 տոկոս։

Զատուլինը կասկածի տակ է դրել ինչպես հրապարակված թվերի արժանահավատությունը, այնպես էլ բուն քվեարկության լեգիտիմությունը։

«Այս ընտրություններն արդեն գերազանցել են բոլոր ռեկորդները կոպտության, վարչական ռեսուրսի օգտագործման, ձերբակալությունների առումով։ Միայն Սամվել Կարապետյանի „Ուժեղ Հայաստան“ դաշինքը կորցրել է իր 70 թեկնածուներին, որոնք ձերբակալվել են ընտրությունների մոտեցման գործընթացում, ձերբակալությունները շարունակվել են բառացիորեն նախօրեին։ Ես շատ եմ կասկածում, որ այս ընտրություններն ընդհանրապես կարելի է օրինական համարել»,— հայտարարել է պատգամավորը։

Նրա խոսքով՝ ցանկացած արդյունք, որը հաստատում է «Քաղաքացիական պայմանագրի» առաջատարությունը, կօգտագործվի, «որպեսզի շարունակվի բնակչության զոմբիացումը Փաշինյանի իշխանության պահպանման անալտերնատիվությամբ և անխուսափելիությամբ»։