ԱՄՆ–ն խոցել է իրանական դրոնները, լարվածությունը Մերձավոր Արևելքում շարունակվում է

ԱՄՆ Կենտրոնական հրամանատարությունը հայտնել է, որ Մերձավոր Արևելքում տեղակայված ամերիկյան ուժերը խոցել են իրանական երկու կամիկաձե անօդաչու թռչող սարք, որոնք սպառնալիք էին ներկայացնում Հորմուզի նեղուցում միջազգային նավագնացության համար։

CENTCOM-ը նշել է, որ ամերիկյան բանակը գտնվում է լիարժեք մարտական պատրաստվածության վիճակում և պատրաստ է «շարունակել պաշտպանվել իրանական ագրեսիայից»։

Չնայած ապրիլի 8-ին հայտարարված հրադադարին՝ այդ ժամանակից ի վեր ԱՄՆ-ն և Իրանը մի քանի անգամ փոխադարձ հարվածներ են հասցրել Հորմուզի նեղուցի շրջանում։

Ավելի վաղ CNN-ը, հղում անելով իր աղբյուրներին, հայտնել էր, որ իրանական զինված ուժերը մի քանի անօդաչու սարք են արձակել դեպի Հորմուզի նեղուց։ Հետագայում CENTCOM-ը ճշտել է, որ ամերիկացի զինվորականներին հաջողվել է խոցել ընդհանուր առմամբ չորս օդային թիրախ։

Բացի այդ, Իրանի գործողություններին ի պատասխան՝ ԱՄՆ բանակը հարվածներ է հասցրել Գորուկեի շրջանում և Քեշմ կղզում տեղակայված իրանական ռադարներին։ Հրապարակման մեջ նշվում է, որ այդ քայլն անհրաժեշտ էր հետագա հարձակումներից պաշտպանվելու համար։