Իրան-ԱՄՆ լարվածությունը սրվում է․ Թեհրանը հրթիռներ է արձակել Քուվեյթի և Բահրեյնի ուղղությամբ

Fars գործակալությունը, հղում անելով Իսլամական հեղափոխության պահապանների կորպուսին (ԻՀՊԿ), հայտնում է, որ Իրանը հարվածներ է հասցրել Քուվեյթում գտնվող ամերիկյան ռազմաբազային և Բահրեյնում տեղակայված ԱՄՆ ռազմածովային ուժերի Հինգերորդ նավատորմի օբյեկտներին՝ Սիրիկ և Քեշմ կղզիների վրա ԱՄՆ-ի հարձակումից հետո։

Իրանական կողմի վարկածով՝ տանկերներից մեկը կանգնեցվել է հարվածից հետո, իսկ մնացածները շրջվել և վերադարձել են։

Մոտ մեկ ժամ անց, ինչպես պնդում է ԻՀՊԿ-ն, ամերիկյան անօդաչու թռչող սարքերը հարվածներ են հասցրել Իրանի հարավում գտնվող երկու կապի օբյեկտների՝ Քեշմ կղզում և Սիրիկ քաղաքում։

Ի պատասխան՝ ԻՀՊԿ-ի օդատիեզերական ուժերը, իրանցի զինվորականների խոսքով, բալիստիկ հրթիռներ են արձակել Քուվեյթում գտնվող Ալի ալ-Սալեմ ավիաբազայի, ինչպես նաև Բահրեյնում տեղակայված ԱՄՆ ռազմածովային ուժերի Հինգերորդ նավատորմի օբյեկտների ուղղությամբ։

Իրանական կողմը այս գործողությունները բնութագրել է որպես պատասխան ամերիկյան հարձակմանը և նախազգուշացրել հետագա էսկալացիայի հնարավորության մասին։ Հայտարարության մեջ ընդգծվում է, որ նման միջադեպերի կրկնության դեպքում պատասխան քայլերը սահմանափակ չեն լինելու։

ԻՀՊԿ-ն նաև կրկին սպառնացել է ամբողջությամբ փակել Հորմուզի նեղուցը՝ համաշխարհային նավթի և գազի արտահանման կարևորագույն երթուղիներից մեկը։ Թեհրանում հայտարարել են, որ նեղուցով էներգակիրների մատակարարումների հնարավոր դադարեցման պատասխանատվությունը կրելու է ԱՄՆ-ը։

Իր հերթին ԱՄՆ Զինված ուժերի կենտրոնական հրամանատարությունը (CENTCOM) հայտարարել է, որ Իրանի զինված ուժերը յոթ բալիստիկ հրթիռ են արձակել Քուվեյթի և Բահրեյնի ուղղությամբ՝ ընդամենը մի քանի ժամ անց այն բանից, երբ ամերիկյան զինվորականները խոցել էին Հորմուզի նեղուցի ուղղությամբ արձակված իրանական հարվածային անօդաչու թռչող սարքերը և հարվածներ հասցրել իրանական ռադիոլոկացիոն օբյեկտներին։

«Նախնական գնահատականներով՝ Իրանի արձակած յոթ հրթիռներից վեցը խոցվել են, իսկ յոթերորդը չի հասել նախատեսված թիրախին», — նշվում է CENTCOM-ի հայտարարության մեջ։