Սկանդալային հայտարարություն Թրամփից՝ Իրանի դեմ ռազմական գործողությունները կվերսկսվեն նոր թափով

Վաշինգտոնը պատրաստ է վերսկսել ռազմական գործողություններն Իրանի դեմ, եթե կողմերի միջև նոր համաձայնագիր չկնքվի։  Fox News  հեռուստաալիքին տված հարցազրույցում այս մասին հայտարարել է ԱՄՆ նախագահ Դոնալդ Թրամփը։ Սպիտակ տան ղեկավարն ընդգծել է, որ Վաշինգտոնի համար առաջնահերթությունը որակյալ և արդյունավետ փաստաթղթի ստորագրումն է, որին հասնելու համար ինքը չի շտապում։

Ամերիկացի առաջնորդը պարզաբանել է, որ թեև գործարքի շուտափույթ կայացումը կհանգեցնի նավթամթերքի, մասնավորապես՝ բենզինի գների նվազմանը, սակայն ավելորդ շտապողականությունը կարող է վնասել վերջնական արդյունքին։ Ըստ նրա՝ Միացյալ Նահանգները միտված է բացառապես ձեռնտու պայմանավորվածության ձեռքբերմանը, հակառակ դեպքում խնդիրը կլուծվի ուժային ճանապարհով։

Դոնալդ Թրամփի խոսքով՝ Վաշինգտոնն աստիճանաբար մոտենում է իր առջև դրված նպատակների իրագործմանը։ Նա վերահաստատել է, որ նախապատվությունը տալիս է հարցի դիվանագիտական կարգավորմանը, սակայն համաձայնության ձախողման դեպքում Միացյալ Նահանգները ստիպված կլինի կիրառել այլընտրանքային մեթոդներ։