Հորմուզի նեղուցում Մոսկվան և Պեկինը կստանան հատուկ կարգավիճակ

Իրանի համար ռազմավարական նշանակություն ունեցող պետությունները, այդ թվում՝ Չինաստանն ու Ռուսաստանը, Հորմուզի նեղուցի հետ կապված հարցերում միշտ կօգտվեն հատուկ մոտեցումից և բարենպաստ պայմաններից։ Այդ մասին РИА Новости-ին հայտնել է Իրանի խորհրդարանի ազգային անվտանգության և արտաքին քաղաքականության հանձնաժողովի նախագահ Էբրահիմ Ազիզին։ 

Ազիզին ընդգծել է, որ թե՛ Մոսկվան, թե՛ Պեկինը մշտապես աջակցել են Թեհրանին, համագործակցել նրա հետ և եղել նրա կողքին ամենաբարդ ժամանակահատվածներում։ Այդ պատճառով, նրա խոսքով, երկու երկրներն էլ հատուկ ուշադրության կարժանանան Հորմուզի նեղուցով նավագնացության և տարանցման կազմակերպման հարցերում։

Պատգամավորի պարզաբանմամբ՝ դա վերաբերում է ինչպես առևտրային նավերին, այնպես էլ նավթատար տանկերներին։

«Հորմուզի նեղուցը մեզ համար ունի առանձնահատուկ աշխարհաքաղաքական նշանակություն։ Այն մեր տարածքային ջրերի և աշխարհագրական տարածքի մի մասն է, ուստի Իրանը իրավունք ունի դրա վերաբերյալ ընդունել ցանկացած որոշում, որը կհամարի անհրաժեշտ, և ոչ ոք չի կարող կասկածի տակ դնել այդ իրավունքը»,- եզրափակել է հանձնաժողովի նախագահը։