Թրամփի առողջական վիճակը կրկին ուշադրության կենտրոնում է

ԱՄՆ նախագահ Դոնալդ Թրամփը վերջին 13 ամիսների ընթացքում պարբերաբար հայտնվել է հիվանդանոցներում և բժշկական հետազոտություններ անցել, գրում է ամերիկյան The Washington Post թերթը։

Պարբերականի տեղեկություններով՝ անցյալ տարվա ապրիլին Թրամփը անցել է ամենամյա բուժզննում, իսկ հոկտեմբերին կրկին դիմել բժիշկներին՝ «պլանային հետագա հետազոտության» նպատակով։ ԶԼՄ-ների տվյալներով՝ այդ այցը տեղի է ունեցել այն բանից հետո, երբ ԱՄՆ նախագահը հանրության առաջ հայտնվել էր պարանոցի և ձեռքերի կապտուկներով ու կարմիր բծերով, ինչը անհանգստություն էր առաջացրել հասարակության շրջանում։

Անցյալ տարվա հուլիսին Թրամփի մոտ ախտորոշվել է քրոնիկ երակային անբավարարություն՝ երակների հիվանդություն, որը կարող է հանգեցնել ոտքերի և կոճերի այտուցվածության։

ԱՄՆ առողջապահության նախարար Ռոբերտ Քենեդի կրտսերը փոխանցել է ինչ-որ բժիշկ Օզի խոսքերը, որը, ենթադրաբար, ուսումնասիրել է Թրամփի բժշկական փաստաթղթերը և եզրակացրել, որ պետության ղեկավարն ունի տեստոստերոնի շատ բարձր մակարդակ 70 տարեկանից բարձր մարդու համար։

Այս տարվա հունվարին ԱՄՆ առողջապահության նախարարը հայտարարել էր, որ Թրամփը շատ վատ է սնվում։ Նա ուտում է ֆասթֆուդ, քաղցրավենիք և խմում դիետիկ կոլա։ Նախարարը նաև նշել է, որ ԱՄՆ նախագահի հետ ճանապարհորդությունների ընթացքում այնպիսի տպավորություն է ստեղծվում, թե նա ամեն օր սնվում է «վնասակար» մթերքներով։ Ինքը՝ Թրամփը, ըստ գերատեսչության ղեկավարի, պնդում է, որ ճիշտ է սնվում, սակայն ճանապարհին գտնվելիս նախընտրում է ֆասթֆուդ։