Մոսկվան սպառնում է Հայաստանին դադարեցնել գազի ու վառելիքի արտոնյալ մատակարարումները

 ՌԴ-ն կարող է միակողմանիորեն կասեցնել կամ դադարեցնել Հայաստանի հետ գազի, նավթամթերքի և չմշակված ադամանդների անմաքս մատակարարումների մասին համաձայնագիրը, եթե Երևանը շարունակի ԵՄ-ի հետ մերձեցման քաղաքականությունը։ Հաղորդում է Коммерсантъ–ը:

Այդ ուղերձը տեղ է գտել ՌԴ էներգետիկայի նախարար Սերգեյ Ցիվիլևի՝ ՀՀ համապատասխան գերատեսչությանն ուղղված նամակում։ Մոսկվայում կարծում են, որ Հայաստանի եվրոպական ինտեգրման շարունակական քայլերը վտանգում են երկկողմ առևտրատնտեսական և ներդրումային համագործակցության հիմքերը։

2013 թվականի փաստաթուղթը Ռուսաստանին հնարավորություն էր տալիս Հայաստանին գազ, վառելիք և ադամանդներ մատակարարել առանց արտահանման մաքսատուրքերի և արտոնյալ պայմաններով՝ կապված ներքին սպառման հետ։ Ներկայումս այդ մատակարարումները շարունակում են կենսական նշանակություն ունենալ հայկական տնտեսության համար․ երկիրը գրեթե ամբողջությամբ կախված է ռուսական գազից, ինչպես նաև ամեն տարի Ռուսաստանից ստանում է նավթամթերքի հիմնական մասը։