SOAD-ը Երևանու՞մ, սրա հետ կապված շփոթմունք կա. Սերժ Թանկյանը հերքել է

Աշխարհահռչակ System of a Down ռոք խմբի հիմնադիր Սերժ Թանկյանն անդրադարձել է Երևանում հուլիսին խմբի համերգի անցկացման մասին լուրերին ու քննարկումներին։ Թանկյանը թեմային անդրադարձել է «Ֆեյսբուք»-ի իր էջի սթորի բաժնում կատարած գրառմամբ։ 

«SOAD-ը Երևանու՞մ։ Սրա հետ կապված, կարծես, շփոթմունք կա։ Մենք պլանավորում էինք համերգ ունենալ այս տարվա հուլիսին, բայց որոշեցինք հետաձգել այն լոգիստիկ և ժամանակային բարդությունների պատճառով։ Մենք դրա մասին կհայտարարենք, երբ պարզ լինի նոր ժամկետը»,- գրել է Թանկյանը։ 

 System of a Down խմբի կողմից այս տարվա հուլիսին համերգ անցկացնելու պլանների մասին հայտնել էր ՀՀ վարչապետ Նիկոլ Փաշինյանը՝ արձագանքելով Ավանում նախընտրական քարոզարշավի ընթացքում իրեն մոտեցած երիտասարդ աղջկա խնդրանքին՝ Սերժ Թանկյանի հետ իր մտերմությունն օգտագործելու ու Երևանում խմբի համերգ կազմակերպելու վերաբերյալ։ Փաշինյանն ասել էր, որ խումբը Երևանի Հանրապետության հրապարակում հուլիսին համերգ կունենա։