Որոշ երկրներ կախված են Ադրբեջանից․ Ալիևի աղմկահարույց հայտարարությունը

Ադրբեջանի նախագահ Իլհամ Ալիևը Euronews հեռուստաալիքին տված հարցազրույցում, խոսելով էներգետիկ բնագավառի ընթացիկ ծրագրերի և ենթակառուցվածքների զարգացման մասին, հայտնել է, որ հաջորդ ամսվա սկզբին երկիրը մտադիր է ազդարարել նոր հանքավայրից բնական գազի արդյունահանումը սկսելու մասին։ Ըստ նրա՝ առկա կարողություններն ու աշխարհագրական դիրքը հնարավորություն են տալիս մեծացնել արդյունահանման ծավալները։

Ադրբեջանական կողմի տվյալներով՝ ներկայումս ադրբեջանական խողովակաշարային գազ է ներկրում եվրոպական 12 երկիր, որոնցից 10-ը հանդիսանում են Եվրամիության անդամ։ Ալիևը ընդգծել է, որ երկրաբանական հետախուզման աշխատանքների և գազատարների ենթակառուցվածքների շնորհիվ Ադրբեջանն առաջատարների շարքում է այն պետությունների թվում, որոնք արտաքին շուկաներ կապույտ վառելիք են հասցնում խողովակաշարերով։

«Որոշ երկրներ կախված են ադրբեջանական գազից»,- ասել է նա։

Անդրադառնալով Հորմուզի նեղուցի ճգնաժամային իրավիճակին՝ Ադրբեջանի նախագահը հավաստիացրել է, որ այն ազդեցություն չի թողել իրենց մատակարարումների շղթայի վրա։ Նրա պնդմամբ՝ պատճառը տրանսպորտային ուղիների և էներգակիրների դիվերսիֆիկացման քաղաքականությունն է, որը տարիներ շարունակ իրականացվել է գործընկերների ու հարևանների հետ։ Նա նաև նշել է, որ նավթի բարձր արժեքը, բացի եկամուտներ բերելուց, գլոբալ տնտեսական տատանումների հետևանքով կարող է նաև վնասներ պատճառել արտասահմանյան ֆոնդային շուկաներում կատարված կապիտալ ներդրումներին։