Ադրբեջանի կողմից կարևոր քայլ կլինի. ՌԴ ԱԳՆ

Ադրբեջանում կալանավորված Ռուսաստանի 11 քաղաքացիների ազատ արձակումը զգալի նշանակություն կունենա երկու պետությունների բարիդրացիական կապերի ամրապնդման համար։

Ռուսաստանի ԱԳՆ ԱՊՀ երկրների չորրորդ գերատեսչության տնօրեն Միխայիլ Կալուգինը ՏԱՍՍ-ին տված հարցազրույցում նշել է, որ 2025 թվականի հունիսի 30-ից հուլիսի 1-ն ընկած ժամանակահատվածում Ադրբեջանում ձերբակալված 11 քաղաքացիների ազատումը մնում է անվերապահ առաջնահերթություն։ Ըստ պաշտոնյայի՝ Բաքվում ՌԴ դեսպանատունը մշտական կապ է պահպանում կալանավորվածների և նրանց ընտանիքների հետ։ Կալուգինը հավելել է, որ հարցը պարբերաբար արծարծվում է ադրբեջանական կողմի հետ երկկողմ հանդիպումների ընթացքում, և խնդրի շուտափույթ կարգավորումը կնպաստի երկրների միջև հարաբերությունների հետագա զարգացմանը։

Ռուսաստանի տասնմեկ քաղաքացիները ձերբակալվել էին կիբեռխարդախության, ինչպես նաև Իրանից թմրամիջոցների մաքսանենգության ու իրացման մեղադրանքներով։ Այս գործողությունները տեղի էին ունեցել Եկատերինբուրգում ադրբեջանցիների ձերբակալությունների և երկու երկրների միջև նկատվող լարվածության ֆոնին։