Լրագրողների միջազգային ֆեդերացիան որոշել է իր կազմից վերջնականապես հեռացնել Ռուսաստանին

Լրագրողների միջազգային ֆեդերացիան որոշում է կայացրել իր կազմից վերջնականապես հեռացնել Ռուսաստանի լրագրողների միությանը (ՌԼՄ):

Ըստ «ԴեՎե»-ի՝ հեռացման պաշտոնական պատճառը 2022 թվականին Ուկրաինայի Խերսոնի և Զապորոժիեի մարզերում ՌԼՄ-ի մասնաճյուղերի հիմնումն է։

Ռուսաստանի լրագրողների միությունն իր հայտարարության մեջ նշել է, որ միջազգային կառույցի այս քայլը համարում է քաղաքականապես պատճառաբանված ու մասնագիտական հիմքերից զուրկ։ Կազմակերպությունը հավելել է, որ չի պատրաստվում բողոքարկել այդ որոշումը։

Ինչպես «ՌԻԱ Նովոստի» գործակալությանը հայտնել է ՌԼՄ ղեկավար Վլադիմիր Սոլովյովը, հեռացման որոշումն ընդունվել է Փարիզում ընթացող Լրագրողների միջազգային ֆեդերացիայի կոնգրեսի ժամանակ։ Սոլովյովի փոխանցմամբ՝ ռուսական կողմը հրավիրված է եղել, սակայն նպատակահարմար չի գտել մասնակցել՝ նախապես ներկայացնելով իր դիրքորոշումը և մատնանշելով ֆեդերացիայի կանոնադրական սկզբունքների խախտումները։

ՌԼՄ-ի անդամակցությունը կասեցվել էր դեռևս 2023 թվականին՝ ֆեդերացիայի նպատակներին ու սկզբունքներին հակասող գործողությունների հիմքով։ Այդ ժամանակ կառույցը հայտարարել էր, որ բռնակցված տարածքներում մասնաճյուղերի ստեղծումը խարխլում է մասնագիտական միասնությունն ու միջազգային համերաշխությունը։ Ֆեդերացիայի նախագահ Դոմինիկ Պրադալիեն շեշտել էր, որ նման քայլերը հակասում են կազմակերպության արժեքներին։

Բրյուսելում կենտրոնակայան ունեցող Լրագրողների միջազգային ֆեդերացիան հիմնադրվել է 1926 թվականին։ Այն աշխարհի խոշորագույն լրագրողական կազմակերպությունն է, որը ներառում է 187 ասոցիացիա ավելի քան 140 երկրից։