Գերմանիան ռևանշի է ձգտում. Մեդվեդև

ՌԴ Անվտանգության խորհրդի փոխնախագահ Դմիտրի Մեդվեդևը RT-ի համար գրված իր հոդվածում նշել է, որ Գերմանիան ի սկզբանե նպատակ է ունեցել վերանայել Երկրորդ համաշխարհային պատերազմի արդյունքները։ Ըստ նրա՝ գերմանական իշխանությունները պարտությունից հետո պաշտոնապես որդեգրել են «մասշտաբային ռևանշի» ուղեգիծ։


Քաղաքական գործչի կարծիքով՝ Գերմանիան հասարակական գիտակցության մեջ նսեմացնում է նախնիների պատասխանատվությունը նացիզմի հանցագործությունների համար։ Մեդվեդևը համոզված է, որ պաշտոնական Բեռլինի գործողություններում նորություն չկա, և պարտված պետության կողմից պատերազմի ելքերը վերանայելու փորձերը սկսվել են դրա ավարտից անմիջապես հետո։


Անվտանգության խորհրդի փոխնախագահը հղում է արել Գերմանիայի պաշտպանության նախարար Բորիս Պիստորիուսի ներկայացրած ռազմական ռազմավարության առաջին հայեցակարգին։ Այդ փաստաթղթում Ռուսաստանը բնորոշված է որպես սպառնալիք «կանոնների վրա հիմնված համաշխարհային կարգի համար»։ 

Մեդվեդևը նշել է, որ ըստ այդ հայեցակարգի՝ Մոսկվան իբր փորձում է թուլացնել դաշինքի միասնությունը, ուստի պետք է դադարեցնել երկխոսության փորձերը և ուժեղացնել ռազմական ճնշումը Ռուսաստանի վրա։ Նրա ձևակերպմամբ՝ սա նշանակում է, որ մասշտաբային ռևանշի կուրսը ստացել է պաշտոնական կարգավիճակ։