«Արդարացի պատասխան» կտրվի Ռուսաստանին. Զելենսկի

Ուկրաինայի նախագահ Վլադիմիր Զելենսկին հայտնել է, որ երկիրը պատրաստվում է «արդարացի պատասխան» տալ ռուսական հարվածներին, որոնք շարունակվել են մայիսի 6-ից Կիևի հայտարարած լռության ռեժիմի պայմաններում: Նրա խոսքերից հետևում է, որ հակադարձ հարվածը հնարավոր է մայիսի 9-ին Մոսկվայում կայանալիք Հաղթանակի շքերթի ժամանակ: Շաբաթվա սկզբին Զելենսկին նշել էր, որ ուկրաինական անօդաչուները կարող են «թռչել շքերթի վրայով» ռուսական տեխնիկայի փոխարեն:

Իր տելեգրամյան ալիքում նախագահը գրել է, որ Ռուսաստանը չի դադարեցրել ռազմական ակտիվությունը, և տարբեր մարզերից ամեն ժամ հաղորդումներ են ստացվում հարվածների մասին: Ըստ նրա՝ Ուկրաինան գործելու է հայելային սկզբունքով և կողմնորոշվելու է պատասխանների հարցում՝ կախված իրավիճակից: Զելենսկին ընդգծել է, որ Ռուսաստանը պատերազմն հասցրել է մի կետի, երբ նրանց գլխավոր շքերթի անցկացումն արդեն կախված է Ուկրաինայից:

Զելենսկին հիշեցրել է Մոսկվային ուղղված՝ մայիսի 6-ից կրակը դադարեցնելու առաջարկը և հավելել, որ Ռուսաստանը գիտի զինադադարի մանրամասները համաձայնեցնելու ուղիները: Նա նշել է, որ եթե Մոսկվայում մեկ անձի միայն շքերթն է հետաքրքրում, ապա դա այլ հարց է, մինչդեռ Ուկրաինան ձգտում է խաղաղության և պատերազմի արժանապատվորեն ավարտին:

Նախագահի գրասենյակի ղեկավարի խորհրդական Միխայիլ Պոդոլյակը «Դոժդի» եթերում հստակեցրել է առաջարկի պարամետրերը. եթե ռուսական կողմը չի հարվածում Ուկրաինայի տարածքին, Կիևը ևս հայելային կերպով հարվածներ չի հասցնում:

Անցյալ շաբաթ ՌԴ նախագահ Վլադիմիր Պուտինը Դոնալդ Թրամփի հետ զրույցում առաջարկել էր զինադադար հաստատել մայիսի 9-ի տոնակատարությունների ընթացքում: Դրանից հետո ՌԴ Պաշտպանության նախարարությունը հայտարարեց մայիսի 8-9-ը միակողմանի կրակի դադարեցման մասին՝ սպառնալով հարվածել Կիևին խախտման դեպքում: Ի պատասխան՝ Պոդոլյակը նշել է, որ Կրեմլից պաշտոնական առաջարկ չեն ստացել, իսկ հանրային տիրույթում եղածը համարել է քարոզչական տարր՝ առանց հստակ մանրամասների և շփումների: