Մեծ Բրիտանիան նոր պատժամիջոցներ է սահմանել

Բրիտանիայի արտաքին գործերի նախարարությունը հայտնել է Ռուսաստանի, Բելառուսի, Ֆրանսիայի և Կամերունի քաղաքացիների, ինչպես նաև մի շարք ընկերությունների դեմ նոր սահմանափակումներ կիրառելու մասին։


Հակառուսական միջոցառումների շրջանակում Միացյալ Թագավորությունը պատժամիջոցների ցանկում է ներառել Ռուսաստանի ութ, Բելառուսի մեկ, ինչպես նաև Ֆրանսիայի և Կամերունի մեկական քաղաքացու։ Սահմանափակող միջոցների տակ են հայտնվել նաև «Ալաբուգա Ստարտ» ծրագրի աշխատակիցները։ Բացի այդ, ցուցակում ընդգրկվել են Չինաստանի և Հոնկոնգի երկու, Թաիլանդի երեք, Կամերունի մեկ և ռուսական երկու ընկերություններ։ Բրիտանիայում սառեցվելու են այդ անձանց ու կազմակերպությունների ակտիվները, իսկ թագավորության քաղաքացիներին արգելվելու է նրանց հետ գործարքներ իրականացնել։


Անօրինական միգրացիայի դեմ պայքարի համաշխարհային պատժամիջոցների ռեժիմով սահմանափակումներ են կիրառվել ևս 17 անձանց և կազմակերպությունների հանդեպ Ռուսաստանից, Հնդկաստանից, Ֆրանսիայից և Կուբայից։ Լոնդոնը նրանց կասկածում է օտարերկրյա քաղաքացիների հավաքագրման գործընթացին մասնակցելու մեջ։