Իրանը ԱՄՆ-ին է փոխանցել 14 կետից բաղկացած փաստաթուղթ

Իրանի իշխանությունները Վաշինգտոնին են փոխանցել 14 կետից բաղկացած փաստաթուղթ, որտեղ նշված են հակամարտության դադարեցման համար Թեհրանի հիմնական պայմանները։


Իրանական կողմի այս առաջարկը պատասխանն է ԱՄՆ-ի նախկինում ներկայացրած ինը կետից բաղկացած ծրագրի, հայտնում են Fars և Tasnim գործակալությունները։ Թեհրանի պահանջների թվում են չհարձակման երաշխիքները, հարակից շրջաններից ամերիկյան զորքերի հեռացումը, ծովային շրջափակման վերացումը և սառեցված իրանական ակտիվների վերադարձը։ Բացի այդ, Իրանն ակնկալում է ռեպարացիաների վճարում, պատժամիջոցների չեղարկում, բոլոր ուղղություններով, այդ թվում՝ Լիբանանում, ռազմական գործողությունների դադարեցում, ինչպես նաև Հորմուզի նեղուցի գործունեության նոր մեխանիզմի սահմանում։


Եթե ԱՄՆ-ն իր նախորդ առաջարկում նախատեսել էր երկամսյա զինադադար, ապա Իրանի իշխանությունները պնդում են, որ բոլոր խնդիրները պետք է վերջնական լուծում ստանան մեկ ամսվա ընթացքում։ Tasnim-ի փոխանցմամբ՝ «Շեշտը պետք է դրվի ոչ թե զինադադարի երկարաձգման, այլ պատերազմի ավարտի վրա»։


Այս պահին Թեհրանը սպասում է Վաշինգտոնի արձագանքին։ Հարկ է նշել, որ Իրանի նախորդ առաջարկից ԱՄՆ նախագահ Դոնալդ Թրամփը դժգոհ էր՝ հայտարարելով, որ հանրապետության իշխանությունները պահանջում են այնպիսի բաներ, որոնք ինքը չի կարող տալ նրանց։