ՏԵՍԱՆՅՈՒԹ. Իսրայելն ընդունել է Լիբանանի մեղադրանքը

Իսրայելի պաշտպանության բանակն ընդունել է, որ Լիբանանի հարավում գտնվող Յարուն գյուղում իրականացված գործողությունների ընթացքում վնասվել է կրոնական նշանակության օբյեկտ:

Իսրայելի պաշտպանության բանակի (ԻՊԲ) ներկայացուցիչ Ավիխայ Ադրաին պարզաբանել է, որ ստորաբաժանումները «Հեզբոլլահի» ենթակառուցվածքների դեմ գործողության ժամանակ վնասել են մի շինություն, որի կրոնական պատկանելության մասին սկզբում տեղեկություններ չեն եղել: Ըստ նրա՝ երբ համալիրի այլ կառույցների վրա համապատասխան նշաններ են նկատվել, զինվորականները քայլեր են ձեռնարկել հետագա ավերածությունները բացառելու համար: ԻՊԲ-ն նաև պնդում է, որ տվյալ տարածքն օգտագործվել է Իսրայելի ուղղությամբ հրթիռային հարվածներ հասցնելու նպատակով:

Մինչ այս, Լիբանանի խորհրդարանի նախագահ Նաբիհ Բերին պահանջել էր պատասխանատվության ենթարկել Իսրայելին երկրի հարավային շրջանների մզկիթներն ու եկեղեցիները թիրախավորելու համար: Նա տեղեկացրել էր, որ շաբաթ օրը Նաբատիայի մոտակայքում գտնվող Էդ-Դուվեյր բնակավայրում իսրայելցի զինվորները հիմնահատակ ավերել են պատմական շիական մզկիթը: Բերին նաև հայտնել էր, որ մայիսի 1-ին գնդակոծության են ենթարկվել Յարունի Սակրե Կյոր կաթոլիկ վանքն ու դպրոցը: Խորհրդարանի ղեկավարի խոսքով՝ նույն զինվորականներն են պատասխանատու ապրիլի 19-ին Դեյր-Սիրյանում Հիսուս Քրիստոսի արձանը ոչնչացնելու և ավելի վաղ Բինտ-Ջուբեյլի Մեծ մզկիթն ավերելու համար: