Մակրոնը կայցելի Գյումրի․ մանրամասներ

Ֆրանսիայի նախագահ Էմանուել Մակրոնը մայիսի 5-ին պետական այցի շրջանակում կայցելի Գյումրի, որտեղ ներկա կգտնվի լայնամասշտաբ համերգային ծրագրի։

Կառավարության այսօրվա նիստին ներկայացված նախագծերի համաձայն՝ գործադիրը համերգի կազմակերպման համար կհատկացնի շուրջ 393 միլիոն դրամ, ինչը գերազանցում է մեկ միլիոն դոլարը։

Որոշման նախագծում նշվում է. «Մայիսի 5-ին Գյումրիի Վարդանանց հրապարակում նախատեսվում է կազմակերպել մեծ համերգ՝ նվիրված Հայաստանի և Ֆրանսիայի բարեկամությանը և մշակութային համագործակցության խորացմանը: Համերգային ծրագրում կհնչեն հայկական և ֆրանսիական թեմատիկ երգեր, որոնք կներկայացնեն հայ և ֆրանսիացի անվանի արտիստներ՝ Հայաստանի պետական սիմֆոնիկ նվագախումբի նվագակցությամբ»։

Միջոցառման անցկացման վայրը՝ Գյումրին, ընտրվել է՝ հաշվի առնելով քաղաքում ֆրանսիական մշակույթի և լեզվի հանդեպ առկա մեծ հետաքրքրությունը։ Ըստ կառավարության՝ սա պայմանավորված է 1988 թվականի երկրաշարժից հետո քաղաքի վերականգնման հարցում Ֆրանսիայի ժողովրդի ու կառավարության ցուցաբերած զգալի աջակցությամբ։