Գնաճը նորանոր ռեկորդներ է սահմանում. «Փաստ»

«Փաստ» թերթը հայտնում է, որ մարտ ամսին գնաճը կազմել է 4,5%, ինչն ավելին է փետրվարի 4,3% ցուցանիշից։ «Լույս» հիմնադրամի դիտարկմամբ՝ սա վկայում է բարձր տնտեսական ակտիվության պայմաններում պահանջարկի կողմից գների պահպանվող ճնշումների մասին։ Միաժամանակ, առաջարկի վրա ազդում են տարածաշրջանային լարվածությունն ու մատակարարման հնարավոր բարդությունները։ Նման իրավիճակում վերաֆինանսավորման տոկոսադրույքը մնացել է անփոփոխ՝ 6,5% մակարդակում։

Վիճակագրական այս տվյալներն անհանգստացնող են, հատկապես անապահով խավի համար, ում համար գնաճն ավելի շոշափելի է։ Թեև ընդհանուր ցուցանիշը ներառում է տարբեր ապրանքախմբեր, առաջին անհրաժեշտության ապրանքները Հայաստանում հաճախ ավելի մեծ չափով են թանկանում, քան ոչ առաջնային սպառման իրերը։ Վերջին տարիներին առաջին անհրաժեշտության ապրանքների գների սրընթաց աճը վատթարացնում է անապահով մարդկանց վիճակը։ Ապրիլին ևս նկատվել են նոր թանկացումներ՝ կապված վառելիքի, մսի և բանջարեղենի հետ։ Ըստ հրապարակման՝ իշխանություններն ու նրանց մերձավորները հարստանում են, մինչդեռ բնակչությունը հետզհետե աղքատանում է։