Արա Նազարյանին մեղադրանք է առաջադրվել. «Հրապարակ»

Հակակոռուպցիոն կոմիտեում քննվող վարույթի շրջանակներում մեղադրանք է ներկայացվել պաշտպանության և արտակարգ իրավիճակների նախկին փոխնախարար Արա Նազարյանին։

«Հրապարակ» թերթի տվյալներով՝ Արա Նազարյանը, ով 2007-2017 թվականներին զբաղեցրել է պաշտպանության փոխնախարարի, իսկ 2017-2020 թվականներին՝ արտակարգ իրավիճակների փոխնախարարի պաշտոնները, ներգրավված է քրեական վարույթում։ Գործը վերաբերում է Պաշտպանության նախարարության կողմից բնակարանների հատկացման գործընթացին, և նախկին պաշտոնյան այնտեղ անցնում է մի խումբ այլ զինվորականների հետ։

Լրատվամիջոցին չի հաջողվել կապ հաստատել Նազարյանի կամ նրա շահերի պաշտպանի հետ՝ մանրամասներ պարզելու նպատակով։ Նշվում է նաև, որ վերջին տարիներին նախկին փոխնախարարը հանրային գործունեություն չի ծավալում, և նրա ներկայիս զբաղմունքի վերաբերյալ տեղեկություններ չկան։