Ինչո՞ւ է թանկացել բենզինը. ՄՊՀ-ն մանրամասներ է ներկայացնում

ՀՀ մրցակցության պաշտպանության հանձնաժողովը հետևում է բենզինի և դիզելային վառելիքի շուկաների զարգացումներին։ Sputnik Արմենիայի հետ զրույցում այս մասին ասել է հանձնաժողովի մամուլի խոսնակ Անի Սմբատյանը։

Նրա խոսքով՝ հանձնաժողովը ուսումնասիրում է բենզինի և դիզելային վառելիքի, բայց ոչ հեղուկ գազի գները, քանի որ հեղուկ գազի շուկան համարվում է մրցակցային՝ կա ավելի քան 180 խաղացող, որոնցից ամենախոշորի մասնաբաժինը 9%-ը չի գերազանցում։

Ինչ վերաբերում է բենզինին, ապրիլին գները բարձրացել են 20-50 դրամով։ Ներկրող ընկերությունները հանձնաժողովի հարցումներին ի պատասխան մատնանշել են բորսայում վառելիքի գների աճը, ինչը հաստատվել է։

«Հանձնաժողովը նախնական ուսումնասիրություն է կատարել և համոզվել, որ ընկերությունները գնի բարձրացման հարցում ունեն տնտեսական հիմք։ Ուսումնասիրությունը դեռ շարունակվում է, դա կարճաժամկետ գործընթաց չէ, տևում է մոտ մեկ ամիս, և մենք հետևում ենք շուկայի զարգացումներին», - ասել է Սմբատյանը։

Ավելի վաղ ՀՀ էկոնոմիկայի նախարարությունը հաստատել էր հեղուկ գազի մասնակի պակասը` բացատրելով, որ շուկայում առկա դժվարությունները պայմանավորված են հիմնականում լոգիստիկ խնդիրներով։ Էկոնոմիկայի նախարարությունը քաղաքացիներին կոչ էր արել չտրվել խուճապային գնումների և առաջնորդվել միայն պաշտոնական տեղեկատվությամբ։