ՏԵՍԱՆՅՈՒԹ. Նիկոլ Փաշինյանի ստացած «Զայեդ» մրցանակի մասին ֆիլմը ստացել է Webby Awards-ի գլխավոր մրցանակը

«Զայեդ» մարդկային եղբայրության մրցանակին նվիրված վավերագրական սերիալն արժանացել է Webby Awards-ի գլխավոր և լավագույն վավերագրական ֆիլմ մրցանակներին։

«Մարդկության սրտխփոցը» (Heartbeat of Humanity) բազմասերիանոց նախագիծը Թվային արվեստների և գիտությունների միջազգային ակադեմիայի կողմից ստացել է գլխավոր մրցանակը։ Միևնույն ժամանակ, ավելի քան 4 միլիոն երկրպագուների քվեարկության շնորհիվ ֆիլմը հաղթող է ճանաչվել նաև լավագույն վավերագրական նախագիծ անվանակարգում։ «Արմենպրես»-ի փոխանցմամբ՝ այս մասին հայտնում է The National-ը:

Մրցանակների հանձնման պաշտոնական արարողությունը տեղի կունենա մայիսի 11-ին՝ Նյու Յորքում։

Վավերագրական ֆիլմը ներկայացնում է «Զայեդ» մարդկային եղբայրության մրցանակի պատմությունն ու դրա դափնեկիրներին։ Մրցանակակիրների թվում են Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը։

Հայաստանի և Ադրբեջանի ղեկավարները «Զայեդ» մարդկային եղբայրության 2026 թվականի մրցանակին արժանացել են փետրվարի 4-ին։ Պարգևը շնորհվել է երկու երկրների միջև խաղաղության հաստատման, ինչպես նաև տարածաշրջանային կայունության ու համագործակցության օրակարգը հետևողականորեն առաջ մղելու համար։