ՏԵՍԱՆՅՈՒԹ. Արքայազն Հարրին ժամանել է Կիև

Մեծ Բրիտանիայի արքայազն Հարրին այսօր ժամանել է Կիև, ինչի մասին տեղեկացնում է բրիտանական ITV News-ը։ Ուկրաինա ժամանելիս նա նշել է, որ հաճելի է դարձյալ գտնվել այդ երկրում։

Ինչպես հայտնել է ITV News-ին, իր նպատակն է թե՛ հայրենիքում, թե՛ ողջ աշխարհում մարդկանց հիշեցնել այն մարտահրավերների մասին, որոնց բախվում է Ուկրաինան։ Նա նաև ցանկանում է սատարել այն անձանց ու գործընկերներին, ովքեր ամեն օր ծանր պայմաններում արտակարգ աշխատանք են իրականացնում։

Արքայազնը ներկա է գտնվելու Կիևի անվտանգության համաժողովին։ Նախատեսված ելույթում նա Ուկրաինան բնորոշելու է որպես ժողովրդավարության առաջնագիծ և դատապարտելու է Պուտինի իրականացրած ռազմական հանցագործությունները՝ դրանք որակելով որպես կանխամտածված ու համակարգված։ Նա նաև զգուշացնելու է, որ այս պատերազմը ոչ թե լոկ տարածքի, այլ արժեքների համար է։

Ծրագրված է նաև Հարրիի այցը Halo Trust բարեգործական կազմակերպության սակրավորներին, որոնց ժամանակին աջակցել է նրա մայրը՝ հանգուցյալ արքայադուստր Դիանան։

Բրիտանական բանակում 10 տարի ծառայած արքայազնը հանդիպելու է նաև իր հիմնադրած Invictus Games Foundation-ի ուկրաինացի անդամների հետ։ Այս կազմակերպությունն աջակցում է վիրավոր վետերաններին՝ սպորտի միջոցով վերականգնվելու հարցում։