ԱՄՆ-ն կազմել է «սև ցուցակ»-ում հայտնված երկրների ցանկը

ԱՄՆ վարչակազմը պատրաստել է հատուկ փաստաթուղթ, որտեղ ՆԱՏՕ-ի անդամ պետությունները դասակարգվել են ըստ իրենց հավատարմության և ցուցաբերած աջակցության աստիճանի։ Ըստ Politico պարբերականի աղբյուրների՝ այս զեկույցը կազմվել է Հյուսիսատլանտյան դաշինքի գլխավոր քարտուղար Մարկ Ռյուտեի՝ Վաշինգտոն կատարելիք այցի նախաշեմին։ Ցուցակում առանձնացվել են այն երկրները, որոնք չեն սատարել Միացյալ Նահանգներին Իրանի հետ հակամարտության հարցում։

Պենտագոնի ղեկավար  Փիթ Հեգսեթը դեռևս նախորդ տարեվերջին էր ակնարկել նմանատիպ մոտեցման հնարավորության մասին։ Ըստ նրա՝ «օրինակելի» դաշնակիցները, որոնք լիարժեք կատարում են իրենց պարտավորությունները և աջակցում են ԱՄՆ նախաձեռնություններին, կստանան արտոնություններ։ Մինչդեռ այն պետությունները, որոնք խուսափում են հավաքական պաշտպանությանը մասնակցելուց, կբախվեն որոշակի հետևանքների։

Թեև Սպիտակ տունը դեռևս գաղտնի է պահում հնարավոր պատժամիջոցների հստակ ցանկը, փորձագետները կանխատեսում են մի քանի հավանական սցենար։ Խոսքը վերաբերում է ՆԱՏՕ-ի ֆինանսավորման կրճատմանը, Եվրոպայում ամերիկյան զորակազմի թվաքանակի նվազեցմանը կամ տեղակայման վայրի փոփոխությանը։ Բացի այդ, «ոչ հուսալի» գործընկերների համար կարող են սահմանափակվել զենքի վաճառքի ծավալները և չեղարկվել համատեղ զորավարժությունները։