Պակիստան-Աֆղանստան սահմանին մարտերը վերսկսվել են

Պակիստանի և Աֆղանստանի միջև սահմանային բախումները վերսկսվել են տոնական հրադադարի ավարտից հետո։ Bloomberg-ի փոխանցմամբ՝ Պակիստանի ԱԳՆ ներկայացուցիչ Թահիր Անդրաբին հայտարարել է, որ գործողությունը կշարունակվի մինչև նախապես սահմանված նպատակների իրականացումը։

Նրա խոսքով՝ Իսլամաբադը Քաբուլում գործող թալիբների կառավարությունից պահանջել է խստացնել միջոցները այն զինյալների դեմ, որոնք, ըստ Պակիստանի, գործում և հարձակումներ են ծրագրում իր տարածքի դեմ։ Աֆղանստանի կողմը, սակայն, հերքել է այդ մեղադրանքները։

Միաժամանակ, աֆղան թալիբների պաշտոնյաները հայտնել են, որ հրադադարի ժամկետի ավարտից հետո սահմանային մարտերը վերսկսվել են չորեքշաբթի։ Associated Press-ի տվյալներով՝ բախումների հետևանքով երկու մարդ զոհվել է, ևս մի քանիսը՝ վիրավորվել։

Հիշեցնենք՝ Սահմանային վիճելի տարածքների շուրջ լարվածությունը շարունակվում է մոտ մեկ ամիս։ Մարտերը դադարեցվել էին մարտի 19-ից 24-ը՝ Ռամադանի տոնակատարության առիթով, Սաուդյան Արաբիայի, Քաթարի և Թուրքիայի դիմումներից հետո։ Դադարից առաջ տարածվել էին տեղեկություններ, թե Պակիստանը ավիահարվածներ է հասցրել Քաբուլում բժշկական հաստատության, ինչի հետևանքով շուրջ 400 մարդ է զոհվել։ Պակիստանը մերժել է այդ պնդումը և հայտարարել, որ թիրախավորել է զինյալների ապաստարան։