Ղազախստանում մեկնարկել է ԵԱՏՄ միջկառավարական խորհրդի նիստը

Ղազախստանի Շիմքենդ քաղաքում մեկնարկել է ԵԱՏՄ միջկառավարական խորհրդի ընդլայնված կազմով նիստը, որին մասնակցում է նաև ՀՀ փոխվարչապետ Մհեր Գրիգորյանը։ Միջոցառմանը ներկա են միության անդամ երկրների պատվիրակությունների ղեկավարներն ու ներկայացուցիչները։

Նիստից մեկ օր առաջ տեղի էր ունեցել քննարկում նեղ կազմով, իսկ այս փուլում ձևաչափը ընդլայնվել է՝ ընդգրկելով լրացուցիչ մասնակիցների։ Օրակարգում ներառված են ԵԱՏՄ անդամ երկրների ինտեգրացիոն համագործակցության խորացման, մաքսային վարչարարության բարելավման և արդյունաբերական համագործակցության զարգացման հարցերը։

Քննարկվում են նաև միասնական տեղեկատվական համակարգի զարգացումը, սպառողների իրավունքների պաշտպանությունը և միության «հնգյակի» երկրներում մակրոտնտեսական իրավիճակը։ Նիստի ավարտից հետո պատվիրակությունների ղեկավարները կմասնակցեն Digital Qazaqstan 2026 թվային ֆորումին։

Փոխվարչապետ Մհեր Գրիգորյանն իր ելույթում մասնավորապես ասել է. «ԵԱՏՄ անդամ պետությունների շահերը պետք է հաշվի առնվեն ռիսկերի կառավարման ազգային համակարգերի կիրառման մոտեցումներն ու կանոնները միասնականացնելիս: Ազատ տնտեսական առևտրի մասին նոր համաձայնագրերը բարձրացնում են միության մրցունակությունը։ Ադրբեջանի տարածքով ՀՀ ապրանքների տարանցման արգելքի վերացումը նպաստում է տարածաշրջանի ներուժի լիարժեք բացահայտմանը և փոխադարձ առևտրի աճին։ ԱԲ տեխնոլոգիայի ներդրումը բարելավում է արտադրողականությունը, նվազեցնում ծախսերը և պարզեցնում լոգիստիկան: Սեփական թվային հարթակների զարգացումը թույլ կտա նվազագույնի հասցնել արտաքին ռիսկերը։ ՀՀ–ն աջակցում է ԵԱՏՄ շրջանակում ԱԲ պատասխանատու զարգացման մասին համատեղ հայտարարության նախապատրաստմանը»։