ԱՄՆ-ն բախվում է «Tomahawk»-ների դեֆիցիտի ռիսկին

Ամերիկայի Միացյալ Նահանգները Իրանի դեմ մեկամսյա ռազմական գործողությունների ընթացքում օգտագործել է «Tomahawk» տեսակի թևավոր հրթիռների ընդհանուր պաշարի ավելի քան մեկ քառորդը։ Այս մասին հայտնում է The Washington Post-ը՝ հղում անելով իրավիճակին ծանոթ աղբյուրներին։ 

Ըստ հրապարակման՝ շուրջ 850-ից ավելի հրթիռների զգալի մասը կիրառվել է գործողության առաջին օրերին, որը կրել է «Էպիկական զայրույթ» անվանումը։ 

Փորձագետների գնահատմամբ՝ պատերազմի սկզբին ԱՄՆ ռազմածովային ուժերի տրամադրության տակ եղել է մոտ 3000–4500 նման հրթիռ։ Միևնույն ժամանակ, դրանց տարեկան արտադրությունը սահմանափակ է՝ ընդամենը մի քանի հարյուր միավոր։ Վերջին սերնդի մեկ հրթիռի արտադրությունը կարող է տևել մինչև երկու տարի, իսկ արժեքը հասնում է շուրջ 3,6 միլիոն դոլարի։ Անցյալ տարվա պաշտպանական բյուջեով գնվել է միայն 57 միավոր։

Ռազմավարական և միջազգային հետազոտությունների կենտրոնի (CSIS) ներկայացուցիչ Մարկ Կանցիանի խոսքով՝ ավելի քան 800 հրթիռի սպառումը կարող է լուրջ դեֆիցիտ ստեղծել։ Նրա գնահատմամբ՝ այդ պաշարների վերականգնումը կարող է տևել տարիներ։