Իրանի ԱԳՆ-ն հայտարարություն է տարածել

Իրանի զինված ուժերը կշարունակեն ռազմական գործողությունները այնքան ժամանակ, մինչև ԱՄՆ նախագահ Դոնալդ Թրամփը հասկանա, որ սկսված գործողությունը սխալ էր։ Այս մասին սոցիալական X հարթակում գրել է Իրանի արտգործնախարար Աբբաս Արաղչին։

Նրա խոսքով՝ Իրանի բանակը շարունակելու է պայքարը, քանի դեռ ԱՄՆ ղեկավարությունը չի ընդունել, որ իր նախաձեռնած պատերազմը անօրինական է և չպետք է կրկնվի ապագայում։ Արաղչին նաև նշել է, որ ԱՄՆ գործողությունների հետևանքով տուժածները պետք է ստանան համապատասխան փոխհատուցում։

Միևնույն ժամանակ, Reuters գործակալությունը, հղում անելով իր աղբյուրներին, հաղորդել է, որ Սպիտակ տունը մերժել է Մերձավոր Արևելքի մի շարք գործընկեր երկրների առաջարկները՝ սկսել դիվանագիտական բանակցություններ, որոնք ուղղված էին Իրանի հետ պատերազմը դադարեցնելուն։

Աղբյուրների տվյալներով՝ Թեհրանը ևս չի դիտարկում որևէ զինադադարի հնարավորություն, քանի դեռ ԱՄՆ-ի և Իսրայելի կողմից իրականացվող հարվածները չեն դադարեցվել։ Ըստ իրանական բարձրաստիճան աղբյուրների՝ մի շարք երկրներ արդեն փորձել են հանդես գալ որպես միջնորդ հակամարտության կարգավորման համար։