Վրաստանն ԵՄ-ին իր պայմաններն է ներկայացրել․ Պապուաշվիլի

Վրաստանի խորհրդարանի նախագահ Շալվա Պապուաշվիլիի խոսքով՝ Եվրամիության հետ հարաբերությունների վերականգնումը հնարավոր կլինի միայն այն դեպքում, եթե Բրյուսելը հրաժարվի երկրի ներքին քաղաքական գործընթացների վրա ազդեցություն գործադրելու փորձերից։ Նրա հայտարարությունը հնչել է լրագրողների հետ զրույցում։

Պապուաշվիլին նշել է, որ եվրոպական կողմը գիտի՝ ինչ քայլեր են անհրաժեշտ հարաբերությունների վերականգնման համար։ Նրա խոսքով՝ առաջնային պայմաններից մեկը Վրաստանում իշխանափոխության փորձերից հրաժարվելն է։ Նա ընդգծել է, որ Թբիլիսին անընդունելի է համարում այն, ինչ որակել է որպես հակաժողովրդավարական ճնշում Բրյուսելի կողմից։

Վրաստանի խորհրդարանի նախագահը նաև հայտարարել է, որ Եվրամիությունը պետք է դադարեցնի տարբեր կազմակերպությունների գաղտնի ֆինանսավորումը երկրում։ Նրա խոսքով՝ անհրաժեշտ է նաև հրաժարվել հակավրացական հռետորաբանությունից և դադարեցնել այն քարոզչության ֆինանսավորումն ու աջակցությունը, որը, ըստ նրա, ուղղված է Վրաստանի դեմ։

Պապուաշվիլիի հայտարարությունը վերաբերում է Վրաստան-Եվրամիություն հարաբերությունների ներկայիս լարված ֆոնին։ Նա ներկայացրել է Թբիլիսիի տեսլականը՝ նշելով, թե ինչ նախապայմաններ է վրացական կողմը դիտարկում երկխոսության վերականգնման համար։