Թրամփն Իրանից անվերապահ կապիտուլյացիա է պահանջել

ԱՄՆ նախագահ Դոնալդ Թրամփը հայտարարել է, որ Վաշինգտոնի և Թեհրանի միջև հնարավոր համաձայնությունը պայմանավորված է Իրանի լիակատար կապիտուլյացիայով։ Այս մասին նա գրել է Truth Social սոցիալական հարթակում։

Թրամփի խոսքով՝ այլ տարբերակով գործարք չի նախատեսվում։ Նա նշել է, որ նման զարգացումից հետո ԱՄՆ-ն և իր դաշնակիցները կաշխատեն Իրանը դուրս բերել ճգնաժամային իրավիճակից և նպաստել երկրի տնտեսական վերականգնմանը։

Գրառման մեջ ամերիկացի առաջնորդը նաև կիրառել է իր հայտնի քաղաքական կարգախոսի՝ MAGA-ի փոփոխված տարբերակը՝ օգտագործելով MIGA ձևակերպումը (Make Iran Great Again՝ «Իրանը կրկին մեծ դարձնենք»)։

Միաժամանակ, մարտի 2-ին Ռուսաստանի նախագահ Վլադիմիր Պուտինը հեռախոսազրույցներ է անցկացրել Մերձավոր Արևելքի մի շարք առաջնորդների հետ՝ քննարկելով ԱՄՆ-ի և Իսրայելի հակամարտությունը Իրանի հետ։ Նա խոսել է Սաուդյան Արաբիայի թագաժառանգ Մուհամմեդ բեն Սալմանի, ԱՄԷ նախագահ Մուհամմեդ բեն Զայեդ Ալ Նահայյանի և Կատարի էմիր շեյխ Թամիմ բեն Համադ Ալ Թանիի հետ։