Մերձավոր Արևելքի լարվածությունը կբերի շատ վատ հետևանքների

Մերձավոր Արևելքում հնարավոր երկարատև հակամարտությունը կարող է լուրջ ազդեցություն ունենալ համաշխարհային էներգետիկ շուկայի վրա։ Այս մասին զգուշացրել է Կատարի էներգետիկայի նախարար Սաադ ալ-Քաաբին՝ նշելով, որ իրավիճակի սրացումը կարող է խաթարել էներգակիրների մատակարարումները։

Նրա խոսքով՝ եթե տարածաշրջանում ռազմական գործողությունները շարունակվեն և հանգեցնեն Օրմուզի նեղուցի արգելափակմանը, նավթի համաշխարհային գինը կարող է հասնել մինչև 150 դոլարի մեկ բարելի դիմաց։ Նման սցենարի դեպքում կարող է աճել նաև բնական գազի արժեքը՝ մինչև 40 դոլար մեկ միլիոն բրիտանական ջերմային միավորի համար։

Ալ-Քաաբին նշել է, որ նման զարգացումների դեպքում Պարսից ծոցի մի շարք երկրներ կարող են արդեն մի քանի շաբաթվա ընթացքում կանգնեցնել էներգակիրների արդյունահանումը և արտահանումը։ Դա, նրա գնահատմամբ, կստեղծի լուրջ ճնշում միջազգային էներգետիկ շուկայի վրա։

Օրմուզի նեղուցը համարվում է համաշխարհային նավթի մատակարարման կարևորագույն ուղիներից մեկը, որով անցնում է նավթի և հեղուկացված գազի զգալի մասը։ Նեղուցի հնարավոր փակումը կարող է զգալիորեն սահմանափակել էներգակիրների համաշխարհային մատակարարումները։