Ադրբեջանի պաշտպանության նախարարությունը նոր հայտարարություն է արել

Ադրբեջանի պաշտպանության նախարարությունը հայտարարել է, որ Իրանի զինված ուժերը անօդաչու թռչող սարքեր են կիրառել Նախիջևանի ուղղությամբ՝ թիրախավորելով քաղաքացիական ենթակառուցվածքներ։

Գերատեսչության տվյալներով՝ տեխնիկական միջոցների միջոցով արձանագրվել է, որ Իրանի տարածքից արձակվել է չորս անօդաչու սարք։ Ադրբեջանի բանակի ստորաբաժանումները դրանցից մեկը խոցել են, իսկ մնացածները, ըստ Բաքվի, ուղղվել են քաղաքացիական օբյեկտների վրա։ Նշվում է, որ դրանցից մեկը թիրախավորել է ավագ դպրոցը ուսումնական ժամերին, սակայն չի հասել շենքին և պայթել է դրա հարակից տարածքում։

Ադրբեջանի պաշտպանության նախարարությունը հայտարարել է, որ չի ընդունում Իրանի զինված ուժերի գլխավոր շտաբի այն պնդումները, թե Թեհրանը հարգում է երկրների ինքնիշխանությունը և չի իրականացրել նման հարձակումներ Ադրբեջանի դեմ։ Բաքուն կոչ է արել դադարեցնել տեղի ունեցածի ժխտումը, ներողություն խնդրել և պատասխանատվության ենթարկել մեղավորներին։

Դեպքի ֆոնին հեռախոսազրույց են ունեցել Ադրբեջանի և Թուրքիայի արտաքին գործերի նախարարներ Ջեյհուն Բայրամովը և Հաքան Ֆիդանը՝ քննարկելով ստեղծված իրավիճակը։