ԱՍՀ նախարարը՝ առաջարկվող վճարման տարբերակը չընտրած 10 հազար կենսաթոշակառուների մասին

ՀՀ աշխատանքի և սոցիալական հարցերի  նախարար Արսեն Թորոսյանը, ԱԺ-Կառավարություն հարցուպատասխանի ժամանակ պատասխանելով ՔՊ խմբակցության պատգամավոր Զարուհի Բաթոյանի՝ կենսաթոշակներն անկանխիկ ստանալու և դրանով անկանխիկ առևտրի վերաբերյալ հարցին, նշեց.

«Այսօր առավոտվա դրությամբ արդեն ունենք 10 հազար քաղաքացի, որ դեռևս չի ընտրել իր վճարման տարբերակը անկանխիկ ձևով, և այսօր մեր վերջին օրն էր դա թույլ տալու կամավոր կերպով, որովհետև մեզ ժամանակ էր անհրաժեշտ, որ համակարգն ամբողջությամբ անկանխիկի անցնի մինչև ապրիլի 1-ը, և վաղվանից արդեն ինքնաշխատ եղանակով մոտ 10 հազար քաղաքացիներ կբաշխվեն 4 բանկերի միջև՝ նաև աշխարհագրական հասանելիությունը հաշվի առնելով:

Ինձ ուղիղ մեկ րոպե առաջ գրեցին, որ 4 բանկի հետ համաձայնագրերն արդեն կնքված են, և կսկսվի առաքումների գործընթացը: Բազմիցս նշել ենք, որ որևէ քաղաքացի զրկված չի լինելու իր կենսաթոշակը ստանալու իրավունքից, բոլոր քաղաքացիներին առաքումները իրականացվելու են: Ավելին, մենք արդեն մեխանիզմներ ենք ներդրել, որ եթե առաքումն այս կամ այն պատճառով ձախողվի, երկրորդ առաքումը տեղի ունենա մեր միասնական սոցիալական աշխատակիցների ներկայությամբ»,- նշել է Թորոսյանը: 

Անդրադառնալով մարզերում անկանխիկ առևտրի հասանելիությանը` նա ասել է. «Մենք բոլորս գիտենք, որ մեր բոլոր տնտեսվարողները պարտավոր են ունենալ ՊՈՍ (POS) տերմինալներ, և իրավունք չունեն մերժել քաղաքացուն իրականացնել անկանխիկ գնում, և մենք բազմիցս, երբ որ լսում ենք նման խնդիրներ, խնդրում ենք տալ տնտեսվարող սուբյեկտների կոնկրետ անուններ: Ես հիմա էլ, առիթը օգտագործելով, ասում եմ՝ եթե կա որևէ տնտեսվարող, որը հրաժարվում է մեր քաղաքացիներին վաճառել որևէ ապրանք կամ ծառայություն անկանխիկ ձևով, դա ապօրինի է, իրավունք չունի նման բան տեղի ունենալ»: 

Նախարարն ընդգծել է, որ ոչ ոք չի չեղարկում կանխիկացումը, բայց իհարկե չեն խրախուսում դա: