Ընդդիմադիր դաշտը ամեն ինչ անում է, որպեսզի ՀՀ-ն մտնի պատերազմի մեջ․ Ալեքսանյան

Հայաստանի ընդդիմությունը առաջարկում է պատերազմ՝ փաթեթավորված տարբեր ձևերով, ՀՀ ընդդիմադիր քաղաքական դաշտն ամեն ինչ անում է, որ Հայաստանի գլխին կախվի պատերազմը: Այս մասին լրագրողների հետ զրույցում ասել է «Քաղաքացիական պայմանագիր» խմբակցության պատգամավոր Վահագն Ալեքսանյանը:

«Ես պնդում եմ, որ ընդդիմադիր դաշտը ամեն ինչ անում է, որպեսզի ՀՀ-ն մտնի պատերազմի մեջ ու պատերազմի ընթացքում կորցնի իր որդիների կյանքը, դրանից հետո էլ ստիպված լինի զրկվել իր ամենաթանկից՝ անկախությունից: Մենք՝ ՀՀ իշխանություն լինելով, հայտարարել ենք, որ դադարեցնում ենք Ղարաբաղյան շարժումը, ու այլևս երբեք չենք սկսելու»,- ասել է նա:

Անդրադառնալով Հայաստանի՝ Իրանին ցավակցական խոսք չհայտնելուն` Ալեքսանյանը նշել, որ ՀՀ իշխանությունը զբաղված է Հայաստանի գործերով, խիստ մտահոգված է տարածաշրջանում տեղի ունեցողով, բայց հորդորել թ լրագրողներին չփորձել ամբողջ աշխարհում տեղի ունեցողը այնպես ներկայացնել, որ կախված է ՀՀ իշխանության հայտարարություններից:

«ՀՀ Անվտանգության խորհուրդը քննարկում է ամենատարբեր հնարավոր զարգացումների սցենարները, իմ անձնական կարծիքով՝ հիմնական ռիսկերը կարող են լինել տնտեսական:

Անվտանգային առումով՝ ինչպես տեսնում եք, Հայաստանում խաղաղություն է, վստահ եմ, որ ՀՀ քաղաքացիները գնահատում են այդ խաղաղությունը: Սա աննախադեպ դեպք է, մինչ սա մշտապես մեզ մոտ էր զոհեր և պատերազմ, ամբողջ աշխարհում խաղաղություն, իսկ հիմա առաջին անգամն է, որ հակառակ պրոցեսն է տեղի ունենում»,- հավելել է պատգամավորը: