«ԹՐԻՓՓ»-ի ճանապարհը չպետք է օգտագործվի Իրանի դեմ․ դեսպան

«ԹՐԻՓՓ»-ի ճանապարհը, որը Հայաստանի համար հաղորդակցային առումով կարող է հնարավորություններ ստեղծել, չպետք է օգտագործվի օտարների կողմից Իրանի դեմ։ Այս մասին մամուլի ասուլիսի ընթացքում հայտարարել է Հայաստանում Իրանի դեսպան Խալիլ Շիրղոլամին։

«Միջանցքի գաղափարը ենթադրում է ինքնիշխանության հարցում որոշակի զիջումներ, ինչը Հայաստանի ու Իրանի համար ընդունելի չէր»,- նշել է նա։

Անդրադառնալով հարցին՝ արդյոք խոսքը միջանցքի, թե պարզապես ուղու մասին է, Խալիլ Շիրղոլամին նշել է, որ իրենց և Հայաստանի Հանրապետության դիրքորոշումները համընկնում են։

Խոսելով Հայաստանի և Ամերիկայի հարաբերությունների շրջանակում Իրանի մտահոգությունների վերաբերյալ՝ դեսպանը ընդգծել է, որ «ԹՐԻՓՓ» ուղղության հետ կապված քննարկումներ են ունեցել ՀՀ պաշտոնատար անձանց հետ և մշտապես շեշտել են երկու երկրների ղեկավարների նախանշած ուղով շարժվելու անհրաժեշտությունը։

«Մենք վերահաստատել ենք մեր աջակցությունը «Խաղաղության խաչմերուկ» կոչվող նախագծին, եթե այն կարող է ապահովել Հայաստանի շահերը: Հայաստանի իշխանությունները մեզ մշտապես հավաստիացնում էին, որ ոչ մի պարագայում այս ճանապարհը ռազմական ու անվտանգային իմաստ չեն ստանա ու Հայաստանի ինքնիշխանությունը այս ճանապարհին կպահպանվի: Մենք չենք ցանկանում այս պահին ընկնել այդ գուշակումների մեջ, թե արդյոք Ամերիկան ունի նման պլաններ, թե ոչ: Մեր և Հայաստանի մեջ վստահություն գոյություն ունի»,- ասել է դեսպանը։