Վրաստանից մեզ որևէ պարզաբանում չի ներկայացվում. Պապոյանը` բեռնատարների վարորդների խնդրի մասին
Հայաստանը մինչ օրս վրացական կողմից պաշտոնական պարզաբանում չի ստացել այն մասին, թե ինչ կոնկրետ խախտումների պատճառով են հայ տնտեսվարողների բեռնատարները կանգնեցվել։ Այս մասին լրագրողների հետ զրույցում հայտարարել է ՀՀ էկոնոմիկայի նախարար Գևորգ Պապոյանը։
Նախարարի խոսքով՝ բեռնատարների վարորդների շուրջ ստեղծված իրավիճակը անհասկանալի է նաև իր համար։ Նա հայտնել է, որ մի քանի օր առաջ Վրաստանի էկոնոմիկայի նախարարը այցելել էր Հայաստան և նշել, որ խնդիրը իրենց գերատեսչության իրավասության շրջանակում չէ, այլ վերաբերում է երկրի ֆինանսական ոստիկանությանը։
«Երկու օր անց նա կապ հաստատեց ինձ հետ և ասաց, որ որոշ ապրանքների հետ կապված ռիսկեր են տեսել։ Այնուամենայնիվ, ես խնդրել եմ հստակեցնել, թե կոնկրետ ինչ ռիսկերի մասին է խոսքը»,- նշել է Պապոյանը։
Նախարարը նաև անդրադարձել է այն վարկածներին, թե իրավիճակը կարող է պայմանավորված լինել Վրաստանի հնարավոր մտահոգությամբ՝ իր տարանցիկ դերի թուլացման վերաբերյալ՝ Հայաստանի և Ադրբեջանի միջև հաղորդակցությունների հավանական ապաշրջափակման ֆոնին։ Պապոյանը նշել է, որ չի կարող մեկնաբանել նման ենթադրությունները։
«Ես խնդրել եմ հստակ նշել՝ որ մեքենայի վարորդը կոնկրետ ինչ խախտում է կատարել՝ այսօր, երեկ կամ ավելի վաղ։ Եթե, օրինակ, տվյալ մեքենայի վարորդը փաստաթղթերի խնդիր է ունեցել, դա մի իրավիճակ է։ Բայց երբ մեքենաները կանգնած են, և մեզ որևէ պարզաբանում չի ներկայացվում, դա այլ իրավիճակ է»,- ընդգծել է նախարարը։
Նրա խոսքով՝ որոշ բեռնատարներ արդեն հատել են սահմանը, սակայն որոշ խմբաքանակների և մեքենաների հետ կապված խնդիրները շարունակում են պահպանվել։
Հիշեցնենք, որ հայ բեռնատարների վարորդները հայտնել էին՝ փետրվարի 12-ից ի վեր Վրաստանից Հայաստան մուտք գործելու գործընթացը զգալիորեն բարդացել է։
