Նոր մանրամասներ դերասանուհի Արսինե Նավասարդյանի որդու սպանությունից. «Ժողովուրդ»

Փետրվարի 16-ին Զովունիում տեղի ունեցած դեպքից նոր մանրամասներ են հայտնի դարձել՝ կապված հայտնի դերասանուհի Արսինե Նավասարդյանի որդու սպանության հետ։ Այս մասին հայտնում է «Ժողովուրդը»:

Ըստ նախնական տվյալների՝ միջադեպը սկսվել է սննդի կետում տեղի ունեցած չնչին նկատողությունից։ Դերասանուհու որդին՝ Ռուբենը, ընկերների հետ ընդմիջման համար այցելել է Զովունիում գտնվող սննդի կետ, որտեղ նկատել են, որ ներկաներից մեկը ծաղրական վերաբերմունք է դրսևորում տարեց տղամարդու նկատմամբ։ Նկատողություն անելուց հետո սկսվել է լեզվակռիվ, որը վերաճել է հայհոյանքների և ծեծկռտուքի։

Վիճաբանության ընթացքում, ըստ հաղորդումների, 45-ամյա Արմեն Զաքարյանը, որը ծեծի է ենթարկվել, օգտագործել է իր անվամբ հաշվառված «Սայգա» տեսակի որսորդական ակոսափող հրազենը և կրակոց արձակել՝ վիրավորելով Ռուբեն Գ.-ին։

Դեպքից հետո Զաքարյանը փորձել է փախուստի դիմել, սակայն կարճ ժամանակ անց հայտնաբերվել է Նաիրիի ոստիկանության ծառայողների կողմից Զովունի գյուղի տարածքում։ Նա ձերբակալվել է ծանր մարմնական վնասվածք պատճառելու կասկածանքով և տեղափոխվել համապատասխան մարմիններ։

Վիրավորում ստացած 31-ամյա Ռուբեն Գ.-ն երեք օր անց՝ փետրվարի 19-ին, մահացել է «Արմենիա» բժշկական կենտրոնի վերակենդանացման բաժանմունքում՝ գիտակցության չգալով։ Արմեն Զաքարյանը ներկայում կալանավորված է, նախաքննությունը շարունակվում է։