Վրացիները սիրում են Հայաստանի գիշերային կյանքը․ Զբոսաշրջության կոմիտեի նախագահը մանրամասնում է

Վրաստանի Էկոնոմիկայի նախարարը Հայաստան կատարած այցի ժամանակ նշել է, որ վրացիները հետաքրքրված են Հայաստանի գիշերային կյանքով և գալիս են ուրախ ժամանակ անցկացնելու։ Այդ մասին մամլո ասուլիսի ընթացքում հայտարարել է Զբոսաշրջության կոմիտեի նախագահ Լուսինե Գևորգյանը։

«Օրեր առաջ Հայաստանում էր Վրաստանի Էկոնոմիկայի նախարարը: Նա փաստեց, որ անգամ իր ընկերների շրջանում՝ շատ արագ է զարգանում Երևան գալու ցանկությունը:

2025 թվականի արդյունքներով՝ զբոսաշրջիկների 41 տոկոսը ժամանում է Ռուսաստանից, այնուհետև աճ է գրանցվել Վրաստանից ժամանող զբոսաշրջիկների ուղղությամբ՝ մոտ 300,000 մարդ, դրան հաջորդում են Իրանից եկողները: Տարբեր երկրներում գործիքները տարբեր են, Ռուսաստանի դեպքում ունենք սահմանափակումներ՝ կապված սոցցանցերի հետ, բայց անցած տարի 2 անգամ մեծ արշավ իրականացրեցինք:

Դեկտեմբեր ամսին Հայաստանում տեղի ունեցած գեղեցիկ արշավների արդյունքում՝ հունվարին ունեցել ենք 40,000-ով ավելի զբոսաշրջիկ, նրանց թիվը հասել է 170,000-ի: Մենք կարծում ենք, որ թվային գործիքները շատ լավ են աշխատում»,- նշել է Զբոսաշրջության կոմիտեի նախագահ Լուսինե Գևորգյանը։