Եվրոպան պետք է մտածի Ռուսաստանի հետ ապագա համակեցության մասին․ Մակրոն

Եվրամիությունը պետք է մանրակրկիտ վերանայի իր ներկայիս անվտանգության հայեցակարգը։ Այս մասին հայտարարել է Ֆրանսիայի նախագահ Էմանուել Մակրոնը Մյունխենի անվտանգության համաժողովում։

Նրա խոսքով՝ ներկայիս մոդելը մշակվել է Սառը պատերազմի ժամանակ և այլևս չի արտացոլում իրականությունը։ Մակրոնը ընդգծել է երկարաժամկետ ռազմավարական մտածողության անհրաժեշտությունը։

Նա նշել է «հեռահար ռազմական հարվածներ» իրականացնելու կարողությունների զարգացման կարևորությունը։

Նախագահը նաև հայտարարել է, որ Ֆրանսիան ուսումնասիրում է իր միջուկային զսպման միջոցները ԵՄ անվտանգության ճարտարապետության մեջ ինտեգրելու հնարավորությունը։ Նրա խոսքով՝ այս հարցի շուրջ խորհրդակցություններն արդեն սկսվել են մի շարք եվրոպացի առաջնորդների հետ։

«Հիմա ուժեղ Եվրոպայի ժամանակն է։ Եվրոպան պետք է սովորի լինել աշխարհաքաղաքական ուժ։ Սա մեր ԴՆԹ-ի մաս չէր կազմում», - ասել է Մակրոնը։

Ֆրանսիայի նախագահը հայտարարել է, որ Ուկրաինայում պատերազմի ավարտը չի հանգեցնի Մոսկվայի քաղաքականության փոփոխության։ Նրա կարծիքով՝ Եվրոպան պետք է մտածի Ռուսաստանի հետ ապագա համակեցության մասին։