Սամվել Կարապետյանը 5-րդ հայցադիմումն է ներկայացրել Ռոման Բաղդասարյանի դեմ
Գործարար Սամվել Կարապետյանը թվով հինգերորդ հայցադիմումն է ներկայացրել բլոգեր Ռոման Բաղդասարյանի դեմ։
«Փաստինֆո»-ի հաղորդմամբ՝ գործարարն այս անգամ ևս պահանջում է դատարանից՝ պարտավորեցնել Բաղդասարյանին՝ հերքել զրպարտությունը և ներողություն խնդրել իրենից, ինչպես նաև՝ որպես բարոյական վնասի փոխհատուցում բռնագանձել 6 մլն դրամ։ Հայցի առիթը եղել է Բաղդասարյանի հայտարարությունները, թե գործարար Սամվել Կարապետյանը խաբել է պետությանը կամ թալանել է պետական բյուջեն, ինչը գործարարդի պնդմամբ՝ սուտ է, չի համապատասխանում իրականությանը։
Երեկ Երևանի ընդհանուր իրավասության քաղաքացիական դատարան մուտքագրված հայցադիմումը, որը մակագրվել է դատավոր Անի Կարաքեհյանին, ինչպես նշվեց, հինգերորդն է՝ ընդդեմ Ռոման Բաղդասարյանի, ընդհանուր առմամբ, գործարարն այս պահին 20 հայց է ներկայացրել դատարան՝ ընդդեմ իրեն զրպարտողների։
Ավելի վաղ հայտնել էինք «Տաշիր» ընկերությունների խմբի ղեկավար Սամվել Կարապետյանը նոր հայց է ներկայացրել դատարան՝ ընդդեմ բլոգեր Ռոման Բաղդասարյանի՝ վիրավորանքի համար։
