Ֆրանսիան առաջարկել է ՆԱՏՕ-ի զորավարժություններ անցկացնել Գրենլանդիայում

Ֆրանսիայի կառավարությունը դիմել է ՆԱՏՕ-ի զորավարժություններ Գրենլանդիայում անցկացնելու առաջարկով։ Այդ մասին հայտնել է Reuters գործակալությունը՝ վկայակոչելով Ֆրանսիայի նախագահ Էմանուել Մակրոնի գրասենյակը։ Ըստ հրապարակման՝ Փարիզը պատրաստ է իր ներդրումն ունենալ հնարավոր զորավարժությունների կազմակերպման և իրականացման գործում։

Նախաձեռնությունը հնչել է այն բանից հետո, երբ ԱՄՆ նախագահ Դոնալդ Թրամփը հունվարի 20-ին հայտարարել էր, թե Դանիան ի վիճակի չէ ապահովել Գրենլանդիայի պաշտպանությունը։ Նրա խոսքով՝ դանիացի որոշ պաշտոնյաներ նույնիսկ չեն այցելում կղզի, և Միացյալ Նահանգները պետք է վերահսկողություն հաստատի այնտեղ։

Նույն օրը ԱՄՆ ֆինանսների նախարար Սքոթ Բեսենթը հայտարարել է, որ Վաշինգտոնը մոտենում է Եվրամիության հետ առևտրային համաձայնագրի նախապատրաստման ավարտին։ Միևնույն ժամանակ նա նշել է, որ Միացյալ Նահանգները մտադիր է 10 տոկոսանոց մաքսատուրքեր սահմանել մի շարք երկրների նկատմամբ, որոնք ռազմական ուժեր կուղարկեն Գրենլանդիա։

Բեսենթի խոսքով՝ նշված մաքսատուրքերը կկիրառվեն այն դեպքում, եթե Դանիան կամավոր կերպով չհրաժարվի Գրենլանդիայից։