ԱՄՆ-ն քննադատել է Իրանին ինտերնետի շարունակական սահմանափակումների համար
ԱՄՆ-ն հայտարարել է, որ Իրանի իշխանությունները նախընտրում են «լռությունն ու մեկուսացումը» իրական ներքին խնդիրների լուծմանը։ Այս մասին ասվում է ԱՄՆ Պետդեպարտամենտի հայտարարության մեջ, որը հրապարակվել է X սոցիալական մեդիա հարթակի պարսկերեն էջում։
Հայտարարության մեջ նշվում է, որ ինտերնետի շարունակական սահմանափակումները ցույց են տալիս Իրանի իշխանությունների ցածր վստահությունը սեփական լեգիտիմության նկատմամբ։ Պետդեպարտամենտը հիշեցրել է, որ Իսլամական Հանրապետության ներկայացուցիչը նախկինում հայտարարել էր ինտերնետի անջատումը մինչև առնվազն մարտի վերջ երկարաձգելու մասին։ ԱՄՆ-ի տվյալներով՝ իրանական հասարակությունն այժմ ավելի քան 216 ժամ գտնվում է թվային մեկուսացման մեջ։
Իրանական Tasnim լրատվական գործակալությունը պնդել է, որ ինտերնետի շրջափակումը համապատասխանում է «միջազգային պրակտիկային», առանց նշելու, թե որ չափանիշներին է վերաբերում։ Fars լրատվական գործակալությունը հայտնել է, որ անձնական հաղորդագրությունները և խմբային զրույցները հասանելի կլինեն բացառապես ազգային հաղորդագրությունների հավելվածների միջոցով։
