Թուրքիան հայտարարել է Ս-400 համակարգերի վաճառքի շուրջ բանակցությունների շարունակման մասին

Թուրքիայի պաշտպանության նախարար Յաշար Գյուլերը հայտարարել է, որ Անկարան շարունակում է բանակցություններ վարել երրորդ երկրների հետ Ռուսաստանից գնված Ս-400 զենիթահրթիռային համակարգերի հնարավոր վերավաճառքի շուրջ։ Այս մասին գրում է Türkiye թերթը։

Նախարարի խոսքով՝ ԱՄՆ-ի հետ ռազմական և քաղաքական ոլորտներում շարունակվող գործընթացի շրջանակում, որը դրական զարգացում է ապրում, կողմերը փորձում են փոխըմբռնման և համագործակցության միջոցով լուծումներ գտնել անցյալի խնդիրների համար, որոնք առնչվում են նաև երրորդ երկրներին։

Միաժամանակ Գյուլերն ընդգծել է, որ Թուրքիայի ազգային պաշտպանության ծրագրերը մշակվում են՝ հաշվի առնելով ներկա և ապագա սպառնալիքների վերլուծությունը։

2017 թվականին Թուրքիան և Ռուսաստանը ստորագրել էին 2,5 միլիարդ դոլարի պայմանագիր, որով Անկարան ձեռք բերեց Ս-400 զենիթահրթիռային համակարգերի չորս դիվիզիոն։ Այդ ժամանակ ԱՄՆ-ն պահանջում էր հրաժարվել ռուսական համակարգերից և փոխարենը գնել ամերիկյան Patriot-ները, սակայն Թուրքիան մերժեց այդ առաջարկը։ Ի պատասխան՝ Վաշինգտոնը Թուրքիային դուրս թողեց F-35 կործանիչների ծրագրից։

Ավելի ուշ Անկարան հայտնել էր, որ պատրաստ է չօգտագործել Ս-400-ները՝ F-35-ների մատակարարումները վերականգնելու դիմաց։ 2025 թվականի հուլիսին ԱՄՆ նախագահ Դոնալդ Թրամփը հայտարարել էր, որ կչեղարկի Թուրքիայի նկատմամբ կիրառված CAATSA-ի շրջանակում սահմանված պատժամիջոցները, իսկ ավելի ուշ նշել էր, որ Թուրքիան կստանա F-35 կործանիչներ։

Թուրքական Hürriyet պարբերականի տվյալներով՝ Անկարան որոշել է ռուսական Ս-400-ները վաճառել Պարսից ծոցի երկրներից մեկին։ Հավանական գնորդների թվում նշվում են ԱՄԷ-ն և Կատարը։

Միաժամանակ Bloomberg-ը հայտնել էր, որ Թուրքիան դիմել է Ռուսաստանին՝ երրորդ երկրին Ս-400-ների վերավաճառքի թույլտվություն ստանալու համար՝ նպատակ ունենալով ազատվել ամերիկյան պատժամիջոցներից և վերադառնալ F-35 ծրագրին։

ՌԴ նախագահի մամուլի քարտուղար Դմիտրի Պեսկովը հաստատել է, որ Մոսկվան և Անկարան շարունակում են կապ պահպանել այս հարցի շուրջ՝ ընդգծելով, որ թեման չափազանց զգայուն է։