Հնդկաստանում ՌԴ դեսպանը կանչվել է ԱԳՆ

Հնդկաստանի արտաքին գործերի նախարարությունը կանչել է Ռուսաստանի ժամանակավոր հավատարմատար Վլադիմիր Լադանովին՝ կապված MV Golden Leo առևտրային նավում գտնվող Հնդկաստանի չորս քաղաքացիների զոհվելու հետ, որը հուլիսի 19-ին Ռուսաստանի կողմից հարձակման էր ենթարկվել Սև ծովի ավազանում՝ Օդեսայի մոտակայքում: Այս մասին երեքշաբթի՝ հուլիսի 21-ին, միմյանցից անկախ հայտնել են Reuters գործակալությունը և The Times of India առցանց պարբերականը:

Նշված հանգամանքներում Հնդկաստանի չորս քաղաքացիների զոհվելու փաստը հաստատել է այդ երկրի կառավարությունը: Եվս մեկ հնդիկ հարձակումից հետո գտնվում է ծայրահեղ ծանր վիճակում: Նավում ընդհանուր առմամբ եղել է անձնակազմի 17 անդամ, որոնցից հինգը՝ Հնդկաստանի քաղաքացիներ:

Լադանովին առաջարկվել է ռուսական կողմին փոխանցել Հնդկաստանի վճռական բողոքը: Նրան նաև հայտարարել են, որ առևտրային նավերին հարվածներ հասցնելը և դրա հետ կապված խաղաղ քաղաքացիների զոհվելն անընդունելի են: «Նման հարձակումները խաթարում են միջազգային ծովային նավագնացության անվտանգությունը, ապահովությունն ու կայունությունը», - ասված է Նյու Դելիի հայտարարության մեջ:

The Times of India-ի տեղեկություններով՝ Օդեսայի մոտ զոհված հնդիկներից մեկը՝ Ահիլ Ջոյան Վելարիկունդուն, 26 տարեկան էր, նա բնակվում էր Հնդկաստանի հարավ-արևմուտքում գտնվող Կերալա նահանգում: Վերջերս Վելարիկունդուն արձակուրդի էր եկել տուն՝ նշանադրության նպատակով: Տղամարդու ընտանիքին նրա զոհվելու մասին տեղեկացրել են հուլիսի 20-ին՝ ծովային առևտրային փոխադրումներ իրականացնող ընկերության էլեկտրոնային նամակով: